– lykkeleg hund, lykkeleg eigar!
Grunna coronasituasjonen har vi for tida ikkje organisert trening med instruktør på Tussa på tysdagar. Men det er framleis lov å møte opp og trene på eiga hand, så lenge ein følgjer smittevernreglane og held god avstand til andre. Vi legg ut eit innlegg kvar tysdag på Facebooksida. Om det skulle bli behov for smittesporing er det fint om dei som tenkjer å ta turen kan like innlegget eller gjerne kommentere slik at vi har loggført kven som kjem!
2 intensiv kvalpekurs er no lagt til under kursfana. Desse kursa er populære, så ikkje nøl med å melde deg på! 🙂
Kursfana er oppdatert med aktuelle kurs.
Nokre bilete frå rallykurset med Hege Ertvåg som vart arrangert på Lid 28.-29. november. Ei lærerik helg for både to- og firbeinte.
Foto: Hege Ertvåg og Lene Solemsaunet
Helga 17. og 18. oktober arrangerte Vestnes Hundeklubb rallystemne, og heile 4 medlemmar frå Ørsta og Volda Hundeklubb var påmelde. Laurdag morgon sette vi nasen nordover, med sommarfuglar i magen.
Vêret spelte ikkje heilt på lag denne helga, så stemnet vart flytta inn i ein liten hall, noko som skapte eit ekstra spenningsmoment for fleire av oss. Det er ikkje alltid godt å vite korleis hundane reagerer i slike situasjonar. Det fekk Siv og Nea erfare, og det enda dessverre med disk for dei i klasse 2-debuten på laurdag. Men ingen sure miner for dét!
Lene og Sienna hadde som mål å greie opprykk til klasse 3 i løpet av helga, og det vart full klaff allereie på laurdag, med 4. plass, 188 poeng og raud sløyfe.
Anita og Synnøve konkurrerer begge i eliteklassen. Det vart ein 4. plass på Anita og Meera denne dagen, medan Synnøve og Ylva tok 3. plassen.
Søndag – ny dag, nye sjansar.
Det fungerte betre for Siv og Nea denne dagen, og dei enda opp på 8. plass av 17 startande i klasse 2.
Lene og Sienna hadde derimot ikkje dagen på søndag, og dei enda opp med ein disk.
Synnøve, som var påmeldt med Vinter i klasse 2 enda opp med 5. plass og napp til klasse 3!
For Anita og Meera klaffa det ikkje heilt denne søndagen. Med ein lykkeleg hund som snurra ein ekstra gong rundt eigaren sin, vart det dessverre ein disk på dei.
For Synnøve og Ylva vart det derimot full klaff. Dei gjekk heilt til topps i eliteklassen og fekk CERT! Vi gratulerer!
Og slik er rallysporten; ein dag klaffar det, og ein annan dag ikkje. Det er noko av det som gjer sporten så spennande. Og uansett resultat, så hadde vi alle ei triveleg og sosial helg i og rundt rallyringen på Vestnes.
Om du er nysgjerrig på denne hundesporten og kunne tenkje deg å lære meir om den, så arrangerer vi rallykurs 28.-29. november. Meir info finn du under kurs-fanen.
Denne veka har det vore flott dugnadsinnsats på banen i Fonna. Tysdag 6. oktober møtte ein heil gjeng opp, og rydda saman agilityutstyret for vinterlagring.
Brakka som står ved banen har vore eit sorgens kapittel i nokre år no. Der er vatnskade på golvplatene, så brakka har eigentleg vore ganske ubrukeleg i den tilstanden den er, og var fyllt opp med mykje rot.
Dugnadsgjengen bretta opp ermane og tømde brakka heilt, og fekk sortert ting som kunne hivast og ting som skulle takast vare på. Så vart golvet inspisert for å sjå om det kunne reddast. Konklusjonen var at der er så mykje råte at det er ikkje anna å gjere enn å rive heile golvet og få lagt nytt.
Kaffipause med nydeleg god sjokoladekake og hundeprat vart det sjølvsagt også tid til 🙂
Onsdag 7. oktober vart det skaffa kontainer, og enda ein gong var det mange møtte opp, på veldig kort varsel! Alt bosset frå kvelden før vart lagt i kontaineren for å køyrast vekk.
Stor takk til alle som stilte opp desse to kveldane!
Heimesida er no oppdatert med aktuell info om styret, kurs og aktivitetar.
Hugs ryddedugnad på Fonna hundebane tysdag 6. oktober kl 18.00.
