November 2015

Då var november starta. Det er mørkt kveldane, men Tussatreningane går som vanleg, Der er lys på parkeringsplassen slik at det er mogleg å sjå folk og dyr rundt seg. Hugs å kle dykk i varme og gode kle. Temperaturen er no på veg nedover.

Andre helga i november (laurdag 14. og søndag 15. november) er planen at me skal ha eit nybyrjarkurs i hundesporten rallylydigheit. Rallylydigheit er ein sport som kombinerar agility, lydigheit og freestyle til ein sport som baserer seg på ulike baner med skilt. Sporten er basert på glede og samspel med hunden. Det er derfor lov å rose hunden gjennom heile bana. Me anbefalar sterkt å melde seg på kurset. Påmelding finn du her. Påmeldingsfristen vert komande søndag. Kurset må ha minimum 6 påmelde for at det skal verte noko av.

I desember vert det julebord. Dette er ein sosial samankomst for alle som er medlemmer i klubben. Julebordet vert 11. desember. I år satsar me på ein “mat på fat” løysing i ei koselig stove på Liadal. Meld deg på i dag!

I januar/februar planlegg me eit intensivkurs som skal gå over to laurdagar. Dette er eit kurs for kvalpar/unghundar som treng hjelp med oppstarten sin. Det er allereie komt nokre påmeldingar, men ferdig dato vert ikkje oppsett før me har nok deltakarar. For dette kurset kan du melde deg på her.

Vidare kjem det eit kurs med Siv Svendsen i slutten av mars. Denne påmeldinga opnar ikkje før rett over nyttår. Her er det begrensa plassar. Kurset handlar om konkurranselydigheit.

Me håpar mange melder seg på dei ulike kursa, og at me ser mange medlemmar på julebord. Til desember ynskjer me å ha eit julemotiv som månedens hund. Send inn dine julebileter av hundane!

Kvalpekurset haust 2015

I går gjekk siste dagen med kvalpekurs av stabelen. Gjennom kvalpekurset i haust har me hatt 15 ekvipasjar som deltok. Desse var fordelt på tre ulike instruktørar; Hege, Else Marie og Anita. Fyrste dagen me møttest var det teori på Ørsta VGS. Her gjekk me gjennom ulik teori som skulle vere førebuande til dei praktiske øktene.

Gjennom seks ulike praktiske økter fekk ekvipasjane prøve seg på sitt, dekk, innkallingar, gå fint i band og andre grunnleggande øvingar for ein god kvardag saman med hunden. Instruktørane prøvde å lære opp eigarane slik at dei kunne seie sitt-bra-belønne-FRI utan å måtte tenke for mykje. At hundane vart betre var sjølvsagt ein god bonus.

Ei av øktene hadde me ulik aktivisering av hund. Her fekk deltakarane prøve seg på agility, rallylydigheit og ulike søk og trikseøvingar. På denne måten fekk dei eit innblikk i kva ulike øvingar ein kan gjere saman med hunden sin.

På siste treninga fokuserte me mykje på kontakttrening, passering av andre hundar og innkalling. Dette fekk dei også prøve i større grupper.

Me håpar kvar enkelt eigar lærte noko nyttig som dei kan bruke no i ettertid av kurset, og at alle fortsetter å trene hundane. Me håper sjølvsagt også å sjå dykk alle og ein kvar på Tussa tysdagane, eller andre stadar med hundane.

Tusen takk for eit kjekt kurs!

– Helsing frå instruktørane

Bileter er tekne av Amalie S. Lillevold. Du finn fleire bileter her. Finn du ikkje din hund? ta kontakt, så kan me sjekke om Amalie har fleire tilgjengeleg.

Oktober 2015, planar framover!

I september var Ørsta og Volda Hundeklubb fullt opptekne med stemnet 2015. Stemnet i seg sjølv vart vellukka, som du kunne lese om i forrige blogginnlegg. Det me gjerne skulle ynskje oss var at fleire medlemmar kunne tenkje seg å stille opp å hjelpe til. I år var me veldig få som hjalp til, og det vart mykje stress for desse. Me håpar og trur at fleire vil hjelpe til neste år slik at me kan fortsette å ha hundestemnet.

Tysdagstreningane er i full gong igjen. Her er det berre å sjekke oversikta på heimesida, og stille opp med godt humør og hund. Me har prøvd å legge opp til eit variert program som instruktørane skal prøve å lære vekk. Tussa klokka 1830 kvar tysdag.

No som hausten er i full gong er snart også hausten sitt kvalpekurs over. Me har hatt ein del forespørslar på kva tid neste kvalpekurs kjem. Eigentleg har me berre to kvalpekurs i året; eit om hausten, og eit om våren. Grunna forespørselen har me no satt opp eit “intensiv kvalpekurs” slik som me hadde tidleg i vinter som var. Du syner interesse gjennom dette skjemaet. Me satsar på å ha dette kurset på to laurdagar i januar eller februar. Alt etter kva tid nok folk har vist interesse. Meld deg på i dag!

Ein hundesport som har vore veldig i elden i det siste er rallylydigheit. Ørsta og Volda Hundeklubb hadde sitt fyrste stemne i samarbeid med Sunnmøre hundeklubb i haust. Dette viste seg å vere veldig vellukka. I høve dette har me satt opp eit nybyrjarkurs for dei som har lyst å lære og prøve ut denne sporten. Påmeldinga til denne finn du her. Dato for kurset vert 14. og 15. november.

Vidare har me satt opp enda eit kurs til våren. Dette vert konkurranselydigheitskurs med Siv Svendsen. Meir informasjon og påmelding kjem snart. Følg med på facebook og på heimesida for å sikre deg plass.

Har du ynskje om andre kurs klubben burde ha, eller kanskje du har andre innspel å kome med? Send ein e-post til hundeklubben@ovhk.com. Du kan også kontakte oss via facebook. Me setter veldig stor pris på fleire bileter til månadens hund. Desse kan du sende til same adresse.

Me ynskjer også å bygge sosiale band saman med dei me trenar med. Derfor vil me allereie no reklamere for årets julebord som vert 11. desember. Dette er verdt å få med seg. Meld deg på her.

Meir informasjon om ulike kurs finn du på sida “kurs” her på heimesida.

 

Nyt hausten!

Og slik vart stemnet 2015..

I helga som var gjekk hundeklubben si største hending i året av stabelen på Ørsta grusbane. Værgudane var på vår side, og sola heldt med oss heile dagen. Stemneområdet vart delt inn i tre ulike ringar. Me hadde rallyring, LPring og ein ring i midten for kvalpeshow og barn og hund.

Stemnet starta klokka 10. I rallyringen stod dommar Hilde Nysether klar saman med ringsekretær Hege Lystad og skrivar Solveig Fløde. Ellers var der folk frå Sunnmøre Hundeklubb som hjalp til og folk frå styret i ØVHK. Det som var ekstra spennande med denne ringen var at det var fyrste gong me som klubb arrangerte rallystemne. Der var 26 ekvipasjar påmeldt. Desse var fordelte mellom klasse 1, 2, 3 og elite.

I kvalpeshowringen var dommar Marcel Kvam klar med hjelp frå ringsekretær Bjørg Ville og skrivar Siv Jensen. Her var det påmeldt 18 ulike raser. Her var dei også flinke å samarbeide med dei andre ringane slik at folk som ville vere med på fleire sportar rakk over fleire ting. Me vil spesielt takke Marcel Kvam for sin fleksibilitet.

Det var i alt 29 kvalpar som vart dømde ein etter ein, der dei til slutt vart plassert best i si rase, best i si gruppe, for så å konkurrere om den gjeve tittelen; Best in Show. Denne gongen vart det ein golden retriever som stakk av med den gjevaste tittelen.

I barn og hund var det mange håpfulle som stod klar for å prøve seg på utstilling. Her var det barn i mange ulike aldrar, men det var vesle Katharina på 3 år som gjekk av med seieren.

I LP ringen var der 11 ekvipasjar påmelde. Desse var fordelt på klasse 1, 2, 3 og elite. Her stod John Egil Fiksdal klar til å dele ut poengsummar med god hjelp frå Robert Storevik som ringsekretær og Frode Grande som digital skrivar. Desse karane klarte seg flott saman som ringpersonell.

Ellers var her mykje folk innom bana på denne strålande laurdagen. Folk kom som publikum og fekk sjå litt kva dei ulike sportane gjekk ut på. Me håpar publikum, deltakarar og fleire har hatt ei flott helg, og me vil igjen takke for eit godt samarbeid i høve dobbelt rallystemne saman med Sunnmøre Hundeklubb.

Fleire bilete frå helga finn du her. Send gjerne inn til oss dersom du har!

Til neste år ynskjer me enda fleire folk som ynskjer å hjelpe til, og enda fleire folk som ynskjer å ta turen. Takk for i år!

Bileter er samla frå ulike fotografar;

Rebekka Tomren, Hege Lystad, Siv Jensen, Hildegunn Bondhus

Ein takk til sponsorar:

 

Stemne 2015

Månadens hund er Zita. Bilete er sendt inn av Solvor Heggli.

Til helga skjer årets store happening i Ørsta, nemleg hundestemne 2015.

Stemne startar klokka 10.00. Då er det oppstart både på kvalpeshow, lydigheit og rally-lydigheit. Fristen for å melde seg på er ute, og alle som er påmeldt skal ha motteke PM.

ALLE er hjarteleg velkomne til å kome som publikum. Det vert enkelt kiosksal og mykje flotte hundar å sjå på. Det ser også ut til at sola tek turen.

For meir informasjon om stemnet kan du gå HIT.

På søndagen vert det rallylydigheit på same staden i regi av Sunnmøre Hundeklubb. Dei vil også stille med lett kiosksal. Ta gjerne turen som publikum!

Ferien er over!

Månadens hund er Buster. Bilete er sendt inn av Roy Emil Olsen.

Då er det duka for oppstart av hundetreningar igjen. Tysdag 18. august startar me opp att med instruktør på tysdagstreningane på Tussa. Hiv deg med å tren saman med oss. Liste over instruktørar og tema kjem i løpet av denne veka. Følg med inne på tysdagstreningssida her på heimesida.

Vidare har me no endeleg opna opp påmelding for kvalpekurs. Direkte link til kurset finn du her. Oppstart vert 27. august, og påmeldingsfristen vert 21. august. Alle som melder seg på før fristen får plass. Meir informasjon om datoar finn du på sida kurs.

Klubben har også no byrja gjere seg klar for vårt årlege stemne. Dette vert den 12. september i år og du finn allereie mykje informasjon om dette på sida vår her. Påmeldingsfristen vert her 17. august.

I høve dette stemnet treng me folk som kan hjelpe med ulike ting. Det kan vere å bake ei kake, hjelpe å sette opp ringband fredagen, vere skrivar, ringsekretær, stå i kiosk eller andre oppgåver. Dersom du skulle ynskje å lære meir om hund og kunne tenkt deg å hjelpe til må du gjerne melde deg. Me set pris på all hjelp. Du kan melde deg via e-post på hundeklubben@ovhk.com, eller du kan fylle ut dette skjemaet.

Me håpar mange tek turen på stemnet, melder seg på kvalpekurs og at de er med på å skape ein aktiv hundehaust!